Тәуелсіз  жылдары еліміздің білім беру жүйесінде түбегейлі өзгерістер пайда болды. Елеулі нормативті және құқықтық актілер қабылданып,жүзеге асырылды. Халыққа білім беру «Қазақстан- 2030 » стратегиялық бағдарламасына сәйкес және Елбасы Н.Ә.Назарбаевтың жыл сайынғы  халыққа арнаған Жолдауында нақтыланған тапсырмалар аясында жүргізілуде. «Мектептің жүрегі - мұғалім»деп Ыбырай Алтынсарин айтпақшы, ұрпаққа білім мен тәрбие беру жұмысында мұғалімнің беделі мен мәртебесі тұңғыш рет «Қазақстан Республикасындағы Білім туралы» Заңнан көрініс тапты. Білім беруді дамытудың 2007-2012 жылдарға арналған, 2007-2011 жылдарға жоспарланған «Қазақстан балалары» және техникалық, кәсіптік білім беру жөніндегі 2008-2012 жылдарға негізделген мемлекеттік бағдарламалары жасалды.

 

Тәуелсіздіктің алғашқы жылдарындағы «оңтайландыру»  саясатына сәйкес, қысқартулардың етек алуына байланысты оқу орындары мен балабақшаларды  мүмкіндігінше сақтап қалу үшін жұмыс жасалды. 2001 жылы Шәкен елді мекенінде орта және Майлыбас бекетіндегі бастауыш мектеп үйлері жаңадан салынды. Жабылып қалған  Ойынды бекетіндегі бастауыш мектеп қайта ашылды. Аудандық білім бөлімі оқушылардың Шағала демалыс лагерін өз балансына алды.

 Оқушылардың білім сапасын арттыру шаралары аудан мектептеріндегі оқу- тәрбие процесінің басты бағыты болды. Мектептерде осы мақсатта кешенді іс-шаралар жасалды. 2002 оқу жылының қаңтар айынан бастап мектептерде мектеп бітірушілердің қай оқу орнына, қандай пәннен емтихан тапсыратынын анықтау мақсатында ата-аналар жиналысы өткізілуде.Бұл жұмыс «Жастарға үміт, болашаққа сенім» атты  аудандық  конференцияда қорытындыланады.

 

1998 жылғы мемлекеттік білім беру стандартына сәйкес  33 мектепте информатика және есептегіш техника негіздері пәні 7- сыныптан бастап аптасына  екі сағаттан оқытылады.

2005-2006 оқу жылында балабақшаларға 895 бала, оның ішінде 735-і мектеп алды даярлық тобына барды. 225 бала елді мекендердегі жаңадан ашылған балабақшаларға, 704 бала мектеп жанындағы мектеп алды даярлық тобына қамтылды.

2005 жылдың желтоқсан айында өткен оқушылардың  облыстық ғылыми жобалар жарысына ауданның 13 мектебінен 20 оқушы қатысты. Ғылыми жобаларды қорғау қорытындысында 19 оқушы жүлдегер атанып, 7 оқушының жұмысы республикалық жарыстың іріктеу турына жіберілді.

Оқушылардың жалпы білім беретін пәндер бойынша өткен облыстық  олимпиадасына ауданның 11 мектебінен 24 оқушы қатысты.Қорытындысында

6 оқушы жүлдегер атанып, 1 оқушы І орын, 2 оқушы ІІ орын, 3 оқушы ІІІ орын иеленді.

Осы жылдары оқушыларға 1844 мұғалім дәріс берді.Ауданда 43 компьтер сыныбы болды. 31 мектеп интернет жүйесіне қосылды. 2005 жылы мектептерге 50тақта, 700 парта, 6 мультимедия кабинеті, 108 компьтер алынды. Қашықтықтан оқыту спутниктік арнасына 2 мектеп қосылды. № 226 гимназияға физика, биология, химия кабинеттері  үшін зертханалық құрал- жабдықтар алынды.

2005-2006 оқу жылында 2 сыныптан бастап ағылшын тілін тереңдетңп оқыту

9 мектепте жүргізілді.Тереңдетілген  бағдарламамен біліктілігі жоғары 17 мұғалім дәріс берді.

2006-2007 оқу жылында 7 оқушы мектепті орта білім туралы үздік аттестатпен бітірсе, 14 оқушы «Алтын белгі» иегерлері атанды. Аудандағы 39 мектептегі 42 ақпараттандыру кабинеттерінде информатика және басқа да пәндерден жаңа ақпараттық технологиялар бойынша сабақтар жүргізілді. 35 мектеп телефондандырылып, интернет жүйесіне қосылды. Шалғай елді мекендердегі №225, 78,134,249 мектептер жаңа спутниктік байланыс арқылы интернетке қосылды.

 

Аудан бойынша 2007 жылы облыстық кәсіби байқауларға 35 мұғалім қатысып, оның 23-і жүлделі І,ІІ,ІІІ орындарды иеленді. Оның ішінде Республикалық «Білім ұясы - 2007» байқауында №226 гимназияның мұғалімі Хадиша Орынбасарова республикалық ең үздік « Жыл сынып жетекшісі - 2007» байқауының  бас жүлдесін  жеңіп алды.

2007-2008 оқу жылын  аудандағы 32 орта, 3 негізгі, 4 бастауыш  мектепті 15886 оқушы аяқтады. Олардың 855-і 11 сынып бітіріп, орта білім туралы аттестат алса, 1527 оқушы 9 сыныпты аяқтап, негізгі білім туралы куәлік иегерлері атанды.ҰБТ-ге ауданның 32 орта мектебін бітірген 855 түлектің 690-ы яғни, 80,7 пайызы қатысты.   Ұлттық бірыңғай тестілеу қорытындысымен № 226 гимназия облыстағы 7 мектептің, республикадағы үздік 100 мектептің қатарына енді. Осы облыстық пән олимпиадасына  34 оқушы қатысып, 15 оқушы жүлдегер атанды.Соңғы үш жылда №226 гимназия оқушылары тұрақты түрде облыстық олимпиадада жүлдегерлер атанса, № 170, 216 мектептер соңғы екі жыл бойы, № 70, 249 мектептер өткен оқу жылында, №16 мектеп 2006 жылы олимпиада жүлдегерін дайындады.

Ғылым әлеміне бет бұрып, республикалық, облыстық ғылыми – практикалық «Дарын» орталығымен байланыса отырып жүргізілетін оқушылардың дәстүрлі облыстық ғылыми жобалар жарысына ауданның 15 мектебінен 33 білім алушы қатысты. Жарыс қорытындысымен жүлделі орын алған және бейіндік пәннен 60-тан жоғары балл жинаған 9 оқушының жұмыстары республикалық жарыстың іріктеу кезеңіне жолдама алды. Нәтижесінде №266 гимназияның 11 сынып оқушысы Нармағамбетов Бауыржан жүлделі І орын алып,ҚР Білім және Ғылым министрінің грамотасымен марапатталып, Астана қаласында өткен «Дарын» орталығының 10 жылдық мерейтойына қатысу құрметіне ие болды.

2007-2008 оқу жылында 92 оқушы тарих пәнінен өткен «Золотое руно», 43 оқушы халықаралық «Кенгуру – математика», 17 оқушы «Кенгуру - Лингвист» конкурстарының жеңімпазы, ал 131 оқушы республикалық «Ақбота» марафонының жеңімпазы атанды.

 

Ғылымға  қызығушылық танытқан жас шәкірттерді түрлі ғылыми- тәжірибелік конференцияларға қатыстыру дәстүрге айналды. Павлодар қаласында өткізілген ҮІІІ «Сәтбаев оқулары» атты халықаралық ғылыми- тәжірибелік конференцияға 22 оқушы қатысып, жүлделі І орынды 11оқушы иемденді. Семей, Қарағанды және Ақтөбе қаларында өткен Кіші Ғылым Академиясының 34-ші республикалық ғылыми-практикалық конференциясына №94,92,226,70 мектептерден және Оқушылар үйінен 12 оқушы қатысып, жүлделі І,ІІ,ІІІ орындарды иеленді.Павлодар қаласында өткізілген «Интеграция образования и науке- шаг в будущее» атты КҒА-ның ХХХҮІІІ республикалық конференциясына №70 мектептен 4 оқушы қатысып, жүлделі орындарды иемденді.

Болашақ ел тізгінін ұстар, дені сау, білімді де саналы жас ұрпақ халқымыздың құдіретті сөз өнерінен тәлім алып өседі. Осыған орай, В.М. Счаснов атындағы №249 мектептің оқушысы Мария Куликова облыстық «Тіл – халық жанын танудың кілті» атты байқауда Іорынды иеленіп, республикалық байқаудың дипломанты атанды.

 

Астана қаласының 10 жылдық мерейтойына байланысты өткен «Астана- сырлы қала, нұрлы қала» тақырыбында өткен облыстық шығармалар байқауында №70 мектептің 10 сынып оқушысы Ақжүніс Сейталиева І орынды иеленді.

ІІІ Республикалық «Дарынды оқушы- талантты ұстазға» атты Астана қаласында өткен педагогикалық олимпиадаға тұңғыш рет қатысқан № 226 гимназия командасы жүлделі І орын иеленіп, аудан абыройын асқақтатты.

«Асыл  қазыналарымызды сақтаймыз және көбейтеміз» атты республикалық сурет көрмесінде № 226, 92 мектептің  оқушылары жүлделі ІІ, ІІІ орындар иемденді.

 

2009 жылы № 226 гимназияның 11 сынып оқушысы Ұлжан Маратқызы «Хабар» агенттігінің ұйымдастыруымен өткен «ХХІ ғасыр көшбасшысы» зияткерлік сайысының жеңімпазы атанып Қазақ – Британ Университетінің грантына ие болды.

Оқушының білімінің сапалы болуы- мұғалімдердің теориялық білімі мен кәсіби біліктілігіне, шығармашылық ізденісіне байланысты. 2007-2008 оқу жылында аудан мектептерінде 2056 мұғалім шәкірттерге ғылым негіздерінен сабақ берді, олардың 1676-сы жоғары білімді, 257-сі арнаулы орта білімді, 96 мұғалім жоғары санатты, 242 мұғалім І санатты мамандар.

 

1995 жылы сәуір айында аудандық білім бөлімінің әдістемелік кабинеті аудандық әдістемелік орталық етіп ашылып, әрбір әдіскер орталық құрамындағы бір-бір кабинеттің меңгерушісі болып тағайындалды. 1997 жылдан аудандық білім бөлімінің әдістемелік орталығына тәжірибелі маман Бағдат Орымбас жетекшілік етті. 2008 жылы аудандық әдістемелік кабинет Республикалық «Үздік әдістемелік кабинет - 2008» байқауында жүлделі І орынға ие болды. Әдістемелік кабинетте түрлі пәндер бойынша білікті де, тәжірибелі ұстаз- әдіскерлер: Қадыр Қалниязов, Катира Тайпақова, Бектас Бектов, Қуантқан Қожалепесов, Жанар Сәрсенбаевалар қызмет атқаруда.

Бағдарлы оқыту мен 12 жылдық білім жүйесіне көшуге орай аудан мұғалімдерінің 883-і білім сапасынан өтті. Оның ішінде 23 мектеп директоры, 45 оқу ісі меңгерушілері, 15 тәрбие ісінің меңгерушілері, 12 директордың бағдарлы оқыту жөніндегі орынбасарлары, 28 психолог,13 қосымша білім беру педагогтары бар.

 

Білім беру реформасын жүзеге асыруда, оқыту мен тәрбиелеудің озық тәжірибелерін өмірге енгізуде кеңестік кезеңде мектеп инспекторлары маңызды қызмет атқарды. Олар білім бөлімінің бас маманы Гүлзипа Нақанова және мамандар Мұратбай Әбубәкіров, Ғабит Сағидуллаев, Ерлан Утепбергенов, Ғалымжан Піркауовтар осы істі лайықты атқарды.

 

2008  жылы Ү.Түктібаев, Жалаңтөс, Басықара елді мекендерінде 2 топтан 50 орындық 3 балабақша ашылды.  Балаларды мектепке дейінгі ұйымдармен толық қамту мақсатында Бекарыстан би, Ақтан батыр, Қ.Пірімов, Майдакөл, Сарыбұлақ ауылдарындағы бос тұрған ғимараттарды ыңғайластыру арқылы балабақшалар ашу, балабақшалардың топ санын көбейту мақсатында Жанқожа, Қожабақы елді мекендеріндегі балабақшаларға топтар қосу, оқу процесінде қолданылмайтын сыныптық орындары бар №234, 165, 190, 92,95 мектептер жанынан шағын орталықтар ашу межеленуде.

 

Мектеп өміріне жаңа ақпараттық технологияны енгізу, мұғалімдердің, оқушылардың ақпараттық технологияны еркін меңгеру дағдысын қалыптастыру мақсатында, аудан мектептерінің компьтер сыныптарында 535 компьютер болды. Аудандағы барлық 32 орта мектеп интерактивті тақтамен, 17 мектеп мультимедия кабинетімен, 5 мектеп физика, 2 мектеп химия- биология кабинеттерінің зертханаларымен жабдықталған. Интерактивті тақтаны пайдаланып, ел Президентімен, облыс әкімімен өткізілгенсабақты жалғастырып, аудан әкіммен Web Cameraмен интерактивті тақтада тікелей байланыс жасау арқылы интернет- конференция өткізілді. Барлық пән мұғалімдерінің  «Интерактивті тақтаны қолдану мүмкіндігі», «Мультимедиа кабинетінің тиімділігі» тақырыптарында семинарлар ұйымдастырылды.Аудандық деңгейде 10 мектепте «Асtivbard интерактивті тақтаның, ActivStudio кәсіби пайдаланушыны бағдарламалық қамтамасыз ету» оқыту семинары өткізілді. Ауданда 34 мектеп интернет жүйесіне қосылып, электронды пошталары ашылған, №91,70, 226, 165, 225, 216, 96, 95, 78, 24, 25 мектептердің Web сайттары жасалып, интернетке тіркелді.